الواحد ساعات بيسرح
و فكره يروح بعيد
يفتكر اللمة الحلوة
أو حتى عم سعيد
كان أطيب واحد فينا
و فى نفس الوقت شديد
فاكر لما سافرنا
و رجعنا ملاقيناهوش
يمكن ساعتها زعلنا
دلوقتى مش فاكرينه
أكيد عايش جوانا
ولا احنا مش لاقيينه
سامحنى يا عم سعيد
لو كنت فى يوم نسيتك
أو لو كان يوم وداعك
آخر مرة دخلت بيتك
و سامحني لأني أصلا
مش فاكر لك حاجة
ذكرياتك بتتمحى
و ملامحك بتتلاشى
ولو النسيان صفتنا
فمعاك نفعني بحاجة
4 comments:
عوداً حميداً يا أبنودي.
جميلة و فيها حاجات كتير... و وزنها و الموسيقى بتاعتها فيها تحسن ما شاء الله...
كمل و اقرأ كتير لشعراء الزجل زي الأبنودي و أحمد فؤاد نجم و صلاح جاهين...
و مستنيين كتير
مبدع دايما يا أفندينا... أو يوستافاندينا يعني
:) آسف
قشدة
يا تري في كام عم سعيد في حياتنا.. و بكره نبقي مكان عم سعيد
استمر.. في انتظار المزيد من الإبداع
حمدا لله على السلامة يا بودز
أجمل ما فيها انك بتهيأ الجو فى الأول للقارئ، و تخليه يسرح معاك و يعيش الذكريات فعلا...و أنصحك بنفس النصيحة بتاعة أنس، القراءة و السماع للشعر هيفرقوا معاك قوى، و ما شاء الله فى تحسن مِلَحْوَظ!!
السلام عليكم
و الله يا جدعان أسعدتموني بكلامكم الجميل
انس:أشكرك على النصيحة و هحاول ان شاء الله
عمرو:اشكرك علي الاضافة الجميلة بغض النظر عن الألش
ابو حميد:الله يكرمك و يسلمك
و بشكركم علي تشجيعكم ليا
نلتقي علي خير
Post a Comment